حكومة "الـزبـل": التعاقـد مع الفساد والمافـيا الإطالية
د. مراد علمي
شحال هادي كانت المملكة المغربية كاتستورد الخوردة من أوروبة، يعني الحوايج القدام، اليوما بدينا كانستوردوا حتى الزبل، أو الفضل كايرجع ألـْـهاد الحكومة اللي تعاقدات مع إيطاليا قصد حرق الزبل الإيطالي فى المغرب.
الحكومة، الدولة اللي كاتحتارم مواطنيها أو مواطناتها ما عمـّـرها كاتقوم بهاد الذل، المهزلة، كاتستورد العلوم، تقنيات عالية، دماغات، منتوجات اللي يمكن ليها تصنع منهم حوايج جداد، بحال ألمانيا اللي ما كاتــّـوفرش على ثروات معدنية، ولاكن على دماغات، رغبة فى الإختراع، الإبتكار أو التألق، اللي كاتستورد ألمانيا قـدّ تقريبا من اللي كاتصدّر، هاكدا كايمكن ليها تضمن الخدمة ألــْـجيوش من القوم أو الفمام.
هاد الصفقة المسمومة، لأن الزبل اللي غادي إلوحوا لينا الطاليان فى أوسط دارنا كولـّـو سمّ، وابا، ما كاتدل على أن هاد الحكومة فى أزمة مالية خانقة أو بدات كاتبيع فى عـرضها حتى تـزّوحات بالشيطان، حيث باعت روحها، ذاتها من أجل دريهمات، فى أول الأمر ضروري نعرفوا واش أدّفعات شي عمولات ألــْـهادا ولا ّ ألا ّخور، لأن عالم الزبل فى إيطاليا معروف، مكشوف أو مفضوح، المافيا هي اللي كاتصـرّف فيه، أو عاد إيجي يفرع لينا راسنا رئيس الحكومة أو يتهم "إلياس العمري" بأنه "مافيوزي"، اللي فيه الفـز كايقفز، أنا ما كايهمـّـنيش هادا ولا ّ لاخور، ما كايهمني غير المغرب أو الشعب المغربي، أمـّـا الأحزاب المغربية خارجة التغطية، أو ما مدّياها غير فى الإمتيازات ديالها، أحسن دليل هي معاشات البرلمانيين أو الوزاء، بلا وجه حق، إيلا بغى يخدم البلاد كايطوّع بلا أي مقابل، ماشي باش يتجر فى السياسة ولا ّ الدين، اللي كفـس، لأن اللي بغى يصلح السياسة بالدين، ما مشى حتى لـوّثهم، فـسـّـدهم بجوج، الديانة مسألة شخصية أو ما عند الدولة فاين تدخل، أمـّـا السياسة كاتدخول فى تدبير الشأن العام.
المغرب كايستورد اليوما الزبل من ناحية "نيـيابل" المشهورة بنفاياتها حتى سمـّـاوها أولاد البلاد "عاصمة الزبل"، غـدّا غادي إسمـّـوْا شي وحدين المغـرب "مزبلة الطاليان"، أو فى السـّـطادات ديال الكورة ما كايعـيــيـّـطوا على الفرقة ديال نييابل غير ب "الزبــّـالة"، كاينين بعض اللعابة ديال الكورة كاع ما بغاوْش يمشيوْا ألــْـنييابل باش ما يضحكوش عليهم صحابهم.
كايننين بعض الشبان اللي فى العمر ديالهم 16 العام، من اللي تولدوا أو هوما متعايشين معا جبولة ديال الزبل، أو فى الضاحية ديال نييابل ما كاينش اللي ما كايكسبش "كليماتيزور"، هاكدا كايمكن ليهم إخرّجوا شوية من الريحة الكريهة اللي كاتجي من الزبل اللي كايبقى سيمانات أو هو كايتـگرمل فى الزنقة، فى الفيلاج "مادّالوني" شدّوا كاع المدرسة بكثرة الخزن ديال الزبل، أو كاينة معلمة اللي ما طلقاتش من حوايجها ريحة الزبل حتى بداوْا كايضحكوا عليها التلامذ ديالها أو كايشـدّوا منخارهم غير كاتدخل ألــّـقسم.
علاش ما كاينينش هاد المشاكل فى مدون إيطالية خرى بحال ميلانو ولا دجينوفا؟ لأن المافيا الإيطالية عاملة يدّيها أو كاتموّل بعض رجال السياسة الفاسدين، الزبل خصـّـو إتــّـفرّق، ها اللي يصلاح، بحال الكارطون، الزاج، البلاستيك إلخ، هاكدا كايمكن ألــّـواحد إقلل من حجم النفايات أو ما غادي توصل ألـمطارح الزبل يلا ّه % 35، ولاكن الزبل اللي كايمشي ألـــّـماطرح كايفوق % 90 ، يعني إيلا بدا الزبل كايتفرق بين اللي كايصلاح أو ما يصلاحاش ماشي فى صالح المافيا الإيطالية، أو لحد الآن ما كاينة حتى شي دائرة ولا ّ ولاية أتــّــجـرآت تقطع الطريق على المافيا.
المجرمين، ولاكن حتى الشركات اللي كاتجمع الزبل رابحة، أو هوما إيه؟ الخطوطة الحمرة بين المجرمين أو رجال السياسة منعادمة، فى الهوى سوى، ما كاين غير هاك أو آرى، النيابة العامة فى نييابل داركة المشكل، قبطوا مافيوزي سوّلوه، قال ليهم: "واحد المرة قولت للشاف ديالي، هاد الزبل ما غادي إكون غير مسموم، ضار بالصحة، ردّ عليـّـا: أو حنا سوقنا؟ ياك كانشربوا غير الما المعديني"، أو هادوا اللي كايدافعوا كولــّـهم على هاد المشروع، باش إردّوا المغرب غير مزبلة وحدة، بحال إيلا ما قدّوناش مشاكيلنا معا الزبل اللي كايعثر فيه الواحد حتى فى أوسط العاصمة الرباط بعض المرّات، نسـكـــّـنوهم حدا هاد المعامل فاين كايتحرقوا هاد النفايات أو نشوفوا ديك الساعة التسنطيح ديالهم.
غير فى 2009 ربحات المافيا الإيطالية كثر من 200 مليار درهم من الزبل، ياك ما دفعوا شي دريهمات ألـْـشي مسؤولين دياولنا؟ على داك الشي كايقولوا لينا الزبل ما ضارّش أو ما كايرجع على الصحة غير بالفضل أو الحوية، كاتربح المافيا الإيطالية غير من الزبل قـدّ اللي كاتربحو التيلكوم الإيطالية ولا ّ 10 ديال المرّات اللي كاتربحو شركة "بـينــيــطون"، الفساد الإيطالي تزوّج، تعاقد اليوما مع الفساد المغربي.
عاد كايجي رئيس الحكومة أو يبدى كايكذب علينا، إقول لينا "حنا جينا باش نقديوْا على الفساد أو المفسدين"، غير البارح كان مزوار أكبر مفسد، اليوما آيْ هايْ حليف مهم، الطامة الكبرى، ها هي هاد الحكومة كاتــّـعاقد اليوما مع القـتــّـالة أو المجرمين، سوّل الطالياني التــّـالي غادي إقول ليك بأن المافيا هي اللي متحـكـمة فى الزبل فى نييـابل أو الضاحية، شنو هو الدور ديال السفير المغربي إيلا ما زوّدش البلاد بخبـيــيــّـرات؟ ولا ّ هاد الأمور كبر منــّـو بكثير؟
يمكن لينا نقوموا بدورنا كامواطينات، مواطنين مسؤولين "على أحسن وجه"، كاين العصيان المدني، ما نخلــّـيوْش إدوخلوا هادوك الكونطونور ألــّـبلاد أو غير نسمعوا بأن هاد الزبل فى الطريق ولا ّ غادي يدخل الشركة اللي تعاقدات معاها الحـيطي، ولا ّ الحيط القصير، يمكن لينا نحتجوا بطريقة سلمية فى باب هاد الشركة معا التعبئة الضرورية ديال جميع المواطنين اللي ساكنين حدا هاد المعمل، المغرب ديالنا كولــّـنا، ما شي ديال هادا ولا ّ لاخور أو يمكن ليه يعمل فيه اللي بغى، عندنا مسؤولية تجاه ألأجيال الماجية، كيف ما خلا ّوْا لينا جدودنا المغرب نخلــّـيوْه لولادنا أو لولاد أولادنا.
