حكومة ْ را سْ الحانوتْ

مراد علمي

أكيد كاينين بعض الكفاءات فى هاد الحكومة ولاكن المشكل بقى فى عدم نسجام جسم الحكومة، شكون اللي غادي إعاقب الناخب المغربي إيلا ما ضمناتش هاد الحكومة لجميع المغاربة مستقبل حسن، خدمة، رفاهية، سكن لائق، تعليم راقي فاين كول مغربي أو مغربية كايلقى راحتو؟ ما كاتبقتاش فى السمييات اللي كاتجي أو تمشي، ولاكن فى البرامج الناجحة، ماشي بحال تعريب التعليم اللي خرج على أجيال حتى بدينا كانحسـّوا برغبة "الحنين إلى الماضي"، يعني فرنستو من جديد، بحال إيلا باقي ما تـحـرّرناش أو تحت صبـّـاط فرانسيس اللي كاتكن شريحة كبيرة منو كراهية غير مسبوقة لجميع المسلمين اللي جاوْا من شمال إفريقيا.

ما حدّنا ما كتبناش كيف كانهضروا ما كاين حتى شي زدهار، تحرر، تكافئ الفرص، ديمقراطية، أفق كايبشــّـر بالخير، لأن جميع الدول الناجحة من الصين حتى الميريكان، حتى الصغارين منهم النرويج، السوييد، الدانمارك، كولهم كيف كايهضروا كايكتبوا، يعني كول واحد كايشارك فى بناء الدولة، المؤسسات، المرافق الأساسية، أمـّـا حنا "كانخوّلوا" أمرنا ألـْـناس عزيز عليهم إخدموا مصالحهم أو مصالح عائلاتهم، حزبهم، كيف أمـّا كان نوعو، كثر من خدمة المواطن البسيط، شحال من واحد حرق راسو من أجل طرف ديال الخبز، لحد الآن ولا سياسي واحد سمعناه تألــّـم ولا ّ زار عائلة المنتحر، كولهم مشغولين غري كيفاش إفجــّـروا طاقتهم فى جميع الجاه أو المال.

والله إيلا مـلــّـينا ما هاد الوجوه، دايرا اللحي ولا ّ مـكـرّطينها، بغينا ناس، سياسيين نقيين، ما كايـتــّـرانجاوش، عندهم مبادئ، تطلعات، رؤية واضحة، برنامج غادي يرجع بالنفع على جميع المغاربة، المغربيات، ماشي التالي فيهم كايحماق على الكورسي أو عسولاتو، فاينا هي النتائج الملموسة ديال الحكومة اللي سبقات باش نكـلـــّـفوا نفس لوجوه، السياسيين إمـّـا بنفس المهمة ولا ّ بمهمات، وزارات جديدة؟ ما كاتبقاش فى تسيير القطاعات اللي عندها ناسها أو خدّامة بلوزير الجديد ولا ّ بلا بيه، ولاكن اللي مهم هو شنو الفايـدة، النتيجة أو الربح اللي غادي يجنيه المواطن

المغربي البسيط من تعيين هادا ولا ّ هاداك، أنا ما كاتهمــّـنيش سميية لوزير، ولاكن كاتهمني النتيجة اللي خصــّـها تكون ديما فى صالح الشعب المغربي، ماشي فى صالح هاد النخبة أوْ لوخرة، الحزب أوْ لاخور.

التعليم باقي مبعثر بحال هادي 40 عام، ما كاين حتى شي تغيير، غير لوجوه كاتمشي أو تجي، حتى السي حصّـاد المهنديز، غادي إجي أو يمشي، التعليم باقي لحد الآن كولــّـو مشاكل، ضطرابات، حتقان، ماكينة كاتصنع غير الشغب، الأفق المسدود، البيطالة، ولو هو العمود الفقري ديال كول دولة، لأن بيه كاتكوّن الطبيب، الفرمليية، المهندز، الطيار، الطباخ، التــّـريسيان إلخ.

ضروري على الدولة أو الأحزاب السياسية تكون جريئة أو تقوم بثورة غير مسبوقة باش تنقد هاد القطاع المعطوب اللي كاينتج، إصدّر غير البؤس أو الكبت حتى أتــّـفضح أمرنا فى العالم بأسره، ألمانيا فاين المئات من المغاربة كايتحرّشوا بعيالات الألمانيين، فى صبانيا، السوييد فاين مغاربة قاصرين كاينعسوا فى الزناقي أو كايكلوا من زبل الصبنيول، السويديين، كون كان التعليم ناجح ما كاينش اللي غادي يخرج من المغرب، ها الصين قـدّها قـدّ الصـّـخط، مليار أو ثلث ميات مليون نسمة، الخدمة متوفرة، غير إيلا ما بغيتيش تخدم، علاش؟ الأمر بسيط، تعليم ناجح، كيف كايتكلــّم الصيني كايكتب.

زايدون هاد الناس براغماتيين، ما كايهمـّوهومش السمييات، التوافوقات، عملية "المعاطية، عطيني نعطيك" ولاكن النتائج الملموسة، الصيني التالي غير كايسالي قرايتو فى الخارج كايرجع لبلادو، أمــّـا حنا لاين غادي نرجعوا؟ ما كاين ما يـدّارفى البلاد، على داك الشي كثير من المغاربة كايفضلوا يبقاوْا بـرّا ولا إدوخلوا لبلادهم اللي سمحات فيهم، حتى أوزير الهجرة ما كايكونش منــّـهم ولاكن من شي حـدّ ما عاش ولا نهار واحد فى الخارج كامهاجر، كيفاش هادا غادي إكون على دراية بمشاكل المغاربة اللي عايشين على برّا أو اللي كايضمنوا لكثر من 15 فى الميا من العائلات المغربية إعيشوا عل الأقل مستورين، كون ما كانوش المغاربة ديال الخارج اللي كايزوّدوا الدولة بالعملة الصعبة باش تشري اللي كايخصـّـها كون بقاوْا المغاربة بالجوع، ولاكن مع كول الأسف بلا أي مقابل، عتراف ولا ّ تنصيب شي حـدّ من أوسط الجالية المغربية، أمــّـا الإحتفالات الموسمية أو الرمزيات، بلا ذوق ولا طعم، ما عندنا ما نديروا بيها، بغينا الملموس.