العـثماني، إمازيغـن الـســّـربـيس
مراد علمي
كان أحمد عصيد كايطلق على هاد النماذج هاد التسمية اللي فى العمق صائبة، لأنه كاينين الأمازيغيين اللي كايرفضوا الـذل أو كاين اللي كاتشريه، تـكريه، ولا ّ تستعملو بحال "سـربـايْ"، أو هاد الأمر كاينطبق على جل الأسماء اللي واردة فى هاد الحكومة، "زعلوكة"، من أمحند، أسجيد حتى أخنوش.
بالله إيلا ما كايحشمش العثماني أو إقول لينا: "حكومتي"، هادا كذب، دجل أو هذيان غير مفهوم، واش أنت بيدّيك شي حاجة بعدا؟ جميع الحكومات المغربية كاتشكل فى الظل، إلا ّ حكومة بن كيران اللولة، والله إيلا راجل سياسة أو دولة كبير، بغينا ولا ّ كرهنا، هو اللي ردّ الإعتبار للسياسة المغربية، ردّ ليها بريقها، حيت كان كايرافع فى البرلمان، ما كاينش اللي ما كايبغيش إسمعو، علاش؟ لأنه كايعرف إبسط الأشياء، كايخاطب الناس باللغة اللي كايفهموا، أو عندو مواقف صارمة، ولـوْ تكون مكلفة فى بعض الأحيان.
العثماني، هاد الفقيه، ما عرفنا شنو تحت راسو أو كيفاش باغي يقضي على البطالة، التعليم الفاشل، المستشفيات
المهترئة، القضاء اللي كلاتو سوسة الرشوة، غادي إحل مشاكل المغاربة بترتيل القرآن أو الفاتحة؟ هادا يمكن لينا نعتابروه غير مكــْري، غادي إدوّز شي أيـّـامات على حسابنا، على نفقتنا، غير أتــّـسالا مهمتو، غادي تلوحو الدولة فى مزبلة التاريخ.
هاد الراجل ما عندو لا كاريزما، لا تصوّر معين، لا رؤية شاملة، الحاجة الوحيدة اللي كايتقن هي الثرثرة بحال فقيه المسيد، أو بالفعل خـصـّـو إشوف شي ختصاصي اللي غادي إعالجو، لأن هاد المرض مرض مزمن، المشكل ديال هاد الناس ما تـايقينش فى راسهم أو كايغطـّـيوْا ضعفهم، ضعف شخصيتهم بالهضرة بلا قياس، الميزة الثانية من هاد التاكتيك هو كايبغيوْا إبانوا عند الناس بأنهم أعضاء مأثرين، عندهم وزن، سلطة، بحال القولة: "حكومتي"، هاد اللفظ ما كايدل غير على وهم من نسيج موخ ّ "العثماني" بلا أي سند منطيقي يتقـبــّـلـو العقل.
القرارات المصيرية ما عمـّر شي حكومة كاتقدّ تـتــّـاخدها، كاتنجز فى محميات خاصة، جميع الحكومات اللي عرفنا لحد الآن غير مدفوعين أو كايلهيوْا الشعب بالثرثرة، اليوما جات نوبة الثرثرة العثمانية، غادي نديروا ليكم، غادي نفعلوا ليكم، بلا ما ننساوش الشعارات المملة، ولو الأمر بسيط : المغاربة ما باغيين هضرة بزاف، باغيين الخدمة، الشي لاخور ما كايهمـّـهومش.
علاش الناس كايحتجـّـوا فى الحسيمة، ما كاين ما يـدّار، أمـّـا إجي هاد السياسي أوْ لاخور أو إقول: "الحكومة ما دارت والو"، ولو هاد الناس هوما المسؤولين على الجهة، هادا الحماق أو بو شيـيــّـار بعينيه، إيوا ورّينا حنــّـة يدّيك، كون خلا ّق، قترح شي حاجة قابلة للتنفيذ، حاول تلقى تمويلات، خارجية ولا ّ حكومية، أمـّـا تجي أو تعوم حتى أنت فوق هاد الموجة، هادي أعمال غير أخلاقية، ولوْ كاتـدّعي بالأخلاق الحميدة أو الأدبيات الحزبية الرفيعة.
كون ما كانوش مغاربة العالم اللي كايمـّـولوا العائلات فى الحسيمة أو الناحية، شنو غادي ياكلوا أخــّـوتنا فى الريف، الحجر، الكيف؟ الدولة هي المسؤولة اللولة، أمـّـا الحكومة مسكينة ما بيدّيها والو، غير الحيط القصير، اللي جا كايلـصـّـق فيها وسـخـو.
الغريب فى الأمر هو أن المغرب كاينتامي للدول الكبيرة المصدرة للسردين فى العالم اللي فى الأصل ما خصــّـوش إفوت الثمن ديالو 3 ديال الدرهام ألـّـكيلو، ولاكن كانلقاوه فى المارشي كايدير 15 ألـْـدرهم، أمــّـا الماركات لوخرين ما كاين غير 50، 100 أو 200 درهم ألــْـكيلو، هادا كايعني بأن بعض اللــّـوبيات محتكرين السوق أو ماشي فى صالحهم تكون ثروات المغرب اللي ماشي ديال حتى شي واحد بوحدو ولاكن ديالنا كولــّـنا كاتفرّق بطريقة عادلة.
أمــّـا الفوسفاط، المناجم، مقالع الرملة إلخ، ضروري نعرفوا شكون اللي كايستافد، لأنه لا يعقل أن أو أولاد المنطقة كايعانيوْا الفقر، التهميش أو الجوع، بلا حتى شي مقابل، عل الأقل النهضة بالبنية التحية أو المرافق العمومية، لا من مدارس، مستشفيات إلخ.
ولا ّ غير حلب حتى تنشف البـزّولة؟ فى الديمقراطيات العريقة جميع هاد الشركات كايكونوا فى طليعة تطور هاد الجهة أو لوخرى، كايفتحوا أوراش، كايبينيوْا مدارس، ثانويات، كايتبرّعوا على المدينة بهيبات مالية قصد تعبيد هاد الطريق أوْ لوخرى، كايخـّدموا أولا المنطقة هوما اللوالى، أمـّـا عندنا الفقير، المسحقوق، كايعيش فقير، يكبر فقير أو إموت فقير، بلا أيّ رحمة ولا شفقة.
ضروري تحل ّ الدولة هاد المشكل أو تصهر على توزيع ثروات المغرب بطريقة عادلة وإلا ّ غادي ندوخلوا فى متاهات حنا فى غنى عنها، علاش طار زين العابديين من بلاصتو، جـرّى عليه الشعب التونسي؟ لأنه ما بقاش كايقـدّ إتــّـحمل الفساد، أو الفساد أو المفسيدين هوما اللي كايخرّبــوا البلاد أو العباد.