مراد علمي
كانحـيــّي الـدولة المغربية من هاد المنبرعلى هاد القرار الجريء، لأن البرقع لباس غريب علينا أو ما عندو حتى شي علاقة مع الحرية الفردية، بالعكس كايكـرّس فكرة خنق، إقبار المرى أو هي حية فى داك الـكــيـطون الشرقي، زايدون ما كايدل البرقع غير على إقصاء، تهميش الآخر أو غطرسة ما عندها حدّ، حنا اللي قرابين ألله أمــّـا نتوما نسيتوه أو نكرتوه.
ضروري ما ننساوش أن من 20 إرهابي اللي قاموا بهجمات 11 نوفنبر 2001 كانوا 15 منهم من السعودية فاين كبر، تـرعرع البرقع أو مشتقــّـاتو، عندنا القفطان أو الجلا ّبة فى المغرب، أو جدودنا الأمازيغ كانوا كايفتاخروا أو كايـورّيوْا أوجهم اللي كان مزيـّـن بلوشام، أو اللي بغى يلبس البرقع أرض الله واسعة، يمشي للشرق، هاد الثقافة غريبة علينا، كولــّـها تطرف، إرهاب باسم، طعم الإسلام السياسي اللي شرّع تركيا فى الهوى، نموذج الإخوان المغاربة الفاشل، فاين أردوغان غير كايدخــّـل ألــّـحبس كول واحد ما عجبوش مُـصطاشو، هادي عاد شي أيــّـامات جرّى عاود تاني على 6000 موظف، أساتذة جامعيين، صحفيين، قضاة، مستخدمين عاديين، بوليس، عسكر إلخ، فاين أمـّـا عشش الإسلام السياسي ما مشى حتى خـرّب البلاد أو العباد، أو كايبدى باللباس أو إساليها بالخرافات، البخـّـوش فى الموخ.
من حق الدولة المغربية، كما من حقنا نطالبوها تضمن لينا السلامة الجسدية، الأمن، السلم الإجتماعي، ولو فى بعض الحالات ضروري نتقبلوا قرارات من المحتمل تضرّ بواحد الفئة معينة، لأنه بحال والو يتسرّب الصرطان للذات كولــّـها حتى إشللها، يحقن الدم اللي كايضور فيها.
هادا اللي باغي مراتو تلبس البرقع ما راضيش بينا، كايرفضنا، شـاك ّ فى هويتنا، حضارتنا، ثقافتنا أو باغي لينا شي حاجة حسن، على حساب سحـابـو، يا حسرة! داعـش، فى عوط ما نزيدو ألــّـقودّام، هادوا باغين لينا الصراعات الطائفية، الدينية حتى إردّوا المغـرب دمـّالـة وحدة، هاداك النهار اللي ما إحلموش بيه، تونس، مصرة، الجزائر، السعودية، السودان، سوريا، العراق، لبنان، اليمن، أفغانستان
إلخ، جميع هاد الدول كلاها الإسلام السياسي من الداخل بحال السـّـوسا، فى اللول اللباس من بعد طلعات النشوة ألــّـموخ، بغى الإسلام السياسي الكورسي، أو اللي ما عجبوش، لأنه مخالف معاه فى الرّي أوالذوق، العافية أو الباروض، ولا ّ حسن "بـَــرقـــْـعـو".
هادوا اللي كايدافعوا على البرقع، والله ما كايحشموا، بالأخص التيار المحافظ اللي عاد كتاشف حقوق الإنسان أو الحريات الفردية، لأنها فى صالحو، أمـّـا العام أو ما طال أو هوما كايقولوا ليك "بـَـني رهـبان"، الإسلام هو الحل، أمــّـا حقوق الإنسان، إنصاف الأقليات هادي غير خزعبلات غربية ما عندنا ما نديروا بيها، لأنه اللي بغينا كانلقاوه فى القرآن، فيه الطيـّـارة، الإنتيرنيت، الآيفون، ولا ّ حتى "مـوليـنـيـكـس"؟
اللي بغيت نقول، القرآن مزيان، ولاكن خصـّـنا ديما نجتاهدوا أو نلقاوْا فيه اللي فيدنا أو إفيد عصرنا، ماشي نتعاملوا معاه بحال إيلا كان كتاب ما قابلش للتأويل، بالعكس هاكدا غادي نـفـهموه حسن، أو ماشي بحال شي وحدين اللي كايفهموه عمدا غالط، حتى كايبداوْا إقتلوا فى الإبرياء، كانوا مسلمين، مسيحيين، بوديين ولا ّ ما عندهم حتى شي دين، أو نتا مالك؟ واش كـلــّـفك الله، قال ليك نوض بدى تقول فى الناس؟ واش ما قادّش بـشغالو، عاد يتكــّـل عليك نـتــا؟ آه، واقيلة كاتشك فيه! "إن بعض الضن إثم".
نتصوّروا شي مرى لابسا البرقع فى المحكمة، كيافاش غادي يعرفها القاضي واش راجل ولا ّ مرى، أو شكون اللي عرف شنو من تحتها، من حق القاضي إقول ألهاد المرى بغيت نشوف وجهك، واش نتيا نيت المعنية بالأمر ولا ّ غير شي شبح من أشباح سيدنا سوليمان.
نتصوّروا طالبات بغاوْا إدوّزوا ليـمـتحـان، آجي نتا بدا تفليهم، كيفاش غادي تفرّق هادي من هادي؟ بغض النظر على اللي باغيين إطرطـقوا راسهم أو يدّيوْا شي وحدين معاهم، ولوْ كانوا طرف من عائلتهم ولا ّ من حومتهم، بالنسبة ليــّـا ما كانشوف فى البرقع غير التخلف، العزلة، عدم التسامح أو الكراهية.
نتصوّروا شي مرى لابسا البرقع أو جا العادل باش يضرب ليها أو ألـْـراجلها الصّـداق، باش غادي يعرفها واش مرى ولا ّ راجل؟ ولا ّ ياك ما هاد خييـّـنا بغى يخود راجل ماشي مرى، هادي غادي تعجب التيار المحافظ اللي فارع لينا راسنا
"بالأخلاق، ثما الأخلاق والخصل الحميدة"، حتى حصـّـلوهم الجدارميا فى النـبــّـوري موسـّـخين المرسيديس بالكلينيسات، أتــّـاقيوْا الله، ما راكوم غير بشر، ما تكونوش مغرورين أو تظنـّـوا أنكم من أحسن خلق الله على وجه الأرض.
نتصوّروا شي معلمة بالبرقع، واش هيـيـا هـيــيـا ولا ّ صافطات خوتها ولا ّ صاحبتها تـقـرّي فى بلاصتها أو هييا "مـَـلاضي"، ضروري إكون البرقع ممنوع فى المدارس، ولا ّ ما يمشي المغرب حتى يرجع بحال أفغانستان، الفولار، مرحبا، البرقع، "أوهو"، لأنه رمز السلفية الجهادية، التزمت، الإسلام السياسي أو التطرف بامتياز، ضروري ستباق العمليات الإرهابية، خونجنة المجتمع، المدرسة فضاء عام، خاص بتعليم الناشئة، شعارو الحياد التام، ماشي السياسة، أو اللي بغى السياسة يخرج من التعليم أو يدخل ألــّـبرلمان، ماشي يجمع بين جوج ديال الخدمات.
نتصوّروا عيالات كايصـوكوا طنوبيلات بالبرقع، الفتنة غادي توقع، كيفاش غادي يمكن ليك تفرّق هادي من هادا، ولا ّ هادا من هادي؟ أو شكون اللي عرف؟ يمكن اللي صـايك راجل، ضارب شي كويـيــّـسات، مخـبـّـع تحت هاد الخزامة "المتنقلة"، والله ما كانفهم هاد الناس، فى الدول الراقية، المتقدمة، المتحضرة كايشوفوا كيفاش إزيدوا ألــّـقودام، إكتبوا، إنتجوا، إختارعوا، أو حنا مشغولين باللباس، هادا نهضر معاه، هادا ألا ّ، لاخور نسلـّـم عليه، ولاكن صاحبو "أوهو"، أو إيلا سلــّـمتي عليه، غير بريوس الصباع، بالظفر حسن.
بالنسبة ليــيــّـا البرقع ما عندو حتى شي علاقة بالحريات الفردية، لأنه كايكرّس طغيان الراجل على المرى، بحال إيلا كانت ماشي كائن ولاكن غير مصدر "فتنة"، ضروري أتــّـغيب من الفضاء العام، حتى خداوْا ليها لوجه أو الحرية، لاحوها فى داك القفز، أو حتى هادوا اللي باغيين إقبـّروا المرى فى البرقع ما مطــّـالعينش مساكن على التاريخ، لأن ليهود أو المسيحيين سبقوهم ألـْـهاد العادة أو ما جابوا حتى شي حاجة جديدة، الجديدة عندهم هي الجديدة فى القديمة، الله إنـجــّـيــنا من الجهل أو خـلاص.
