مراد علمي
بالفعل ترامب هو اليوما خادم الحرمين الحقيقي، أمـّـا آل السعود غير كاريين الســّـاروت حتى إحـنّ الله، لأن بعد أمـّـا وقــّـع، عـقـد هاد الصفقة اللي فى الأصل رشوة صحيحة ضروري يحمي لا الحرمين، لا الحرايميين، لا كورسي آل السعود اللي سـيــيــّـلوا ريـوكـو بهاد 380 مليار دولار، كثر من 200 مليار دولار بوحدها غادي تستثمر فى ميريكان، الشي لاخور كولـّـشي سلاح، ولـوْ كانعرفوا بأن ميركان ما عـمـّـرها تعطي ألـْـبلاد عربية شي سلاح مطوّرة بزاف اللي يمكن ليها تهـدّد الكيان الصهيوني.
ترامب كايحماق على السعوديين، لمــّـا قال قبل ما يرجع رئيس الحكومة الميريكانية، مع السعوديين ما عندي موشكل، واش اللي كايشري من عندك برطـما ب 40 مليار سانتيم أو كثر، عندك معاه موشكل؟ لا! هاد 380 مليار دولار فدية، باللغة المغربية، زطـاطا، غادي تدفعها السعودية باش ما إتابعوش العائلات الميريكانية الدولة السعودية على ديك الهجمات الإرهابية اللي وقعات فى نيويورك أو كانوا مورّطين فيها 15 سعودي على 20 ديال الإرهابيين، لأن بلا ضغط الدولة الميريكانية ما عند هاد العائلات الميريكانية حتى شي حظ باش إقبطوا حقـهم، باقي ما نسيناش الفدية اللي
دفعات ليبيا ألضحايا "لوكربي"، شكون اللي ضغط على ليبيا حتى اضـرّات تخلــّـص بالسـّـيف عليها؟ الدولة البريطانية.
والله ما تفهم شنو كايضور فى موخ الحكام، الساسة العـرب، اللي كايسـبــّـهم هو اللي كايـتـهــلا ّوا فيه، أمـّـا اللي كايعاملهم بلطف ما عـندو قيمة، لأنهم كايقولوا هاداك فى يـدّنا، كرشنا، بغينا حتى لاخور اللي مـعـنـتر، باش نـطـوّعوه، نركبو فوق منـّـو أو نعملوا ليه الشواري، بالنسبة لـيـّـا هاد ترامب ما فيه ثـيـقة، لأنه بيـّـاع أو شرّاي، صاحب الهموز أو لسانو مشقوق على جوج أو ثلاثة، بحال اللفعة.
كانتـفـّهـم موقف العاهل المغربي إيلا ما بغاش يمشي للسعودية، شنو غادي إدير تمـّـا؟ واش اللي ما بغاش يستقبلك أو هان شعب كولـّـو عاد تعطيه ولا دقيقة وحدة من وقتك؟ زيد عليها أن ترامب لحد الآن كايحارب المسلمين أو الدول الإسلامية، لأن المرسوم اللي كايمنع مواطنين من 7 دول إسلامية إدوخلوا مريكان باقي ساري المفعول، أو علاش غير مواطنين الدول الإسلامية هوما اللي كايتبهدلوا فى المطارات الميريكانية أو خصّـهم إحـطـّـوا البورطابلات، الطابليتات أو الكومبيوتارات فى البالزة؟ هادي ماشي عنصرية، ميز، حكرة؟ يمكن حكام الدول الإسلامية ولا ّ العربية مازوخيين بامتياز، ولا ّ من أجل الكورسي يتـزوّجوا، يتناسبوا حتى مع الشـيـطان؟
أمـّـا الإرهاب اللي كايهضر عليه ترامب خرج من رحم ميريكان أو اللي كايضور فى فلكهم، لـمـّـا ردّوا العراق غير كومشة ديال التراب أو الغبرة، جـرّاوا على ضباط كبار من جيش صدام حسين اللي كـوّنوا مع متطرفين خرين "الدولة الإسلامية"، الدولة الإسلامية صنع مريكاني محض، هوما المسؤولين اللوالى على اللي كايطرا فى الشرق الأوسط، تسبــّـبوا فى قتيلة كثر من مليون عراقي، هدّموا البلاد بلا ما إكون عندهم حتى شي مشروع من بعد الحرب، ألمانيا عطاوها الفلوس أو قاموا بترسيخ الديمقراطية من بعد الحرب العالمية الثانية، أمـّـا العراق دخلوا ليه، خـرّبوه أو خرجوا بلا ما تكون عندهم حتى شي رغبة فى دمقرطة البلاد، أو كايتفاجؤى اليوما كيفاش ستولات "الدولة الإسلامية" على طرف ديال الأرض قـدّ النـّـكليز.
هاد السلاح كولــّـها من المحتمل تستعملها السعودية ضد أولاد بلادها، بالأخص فى الشرق، الهضرة الخاوية عزيزة على السعودية اللي بغات تسيفط العسكر ألــْـسوريا باش إحارب "داعش"، لحد الآن غير بلاغات بحال حكومتنا أو مشاريعها الوهمية، غير اليمن، ديك البلاد الميكروسكوبية، ما قـدّاتش عليها، ما حساك عاد إيران.
ترامب خطب فى ممثلين، رؤساء الدول الإسلامية، بلا ما إقـدّ إتــّـكلم على الإسلام المتشدد اللي كاتصدّر السعودية ألــّـعالم بأسره، إسلام كولــّـو حقد، تـزمـّـت، عنصرية، كذوب أو تضليل.
أو الفعلة اللي قام بيها ملك السعودية ما عمـّـرها تلقى طريقها لــَـعـقل شي واحد ساحي لمــّـا وشـّـح ترامب بأرفع وسام المملكة السعودية، شنو عمل يا حسرة؟ واش اللي كايسبـّـك، كايشتم دينك عاد كاتكـبــّـر بيه؟ ولاكن من أجل الخلود، توريث الكورسي أو البدخ، كولـّـشي مباح، بيع أمـّـك، أبــّـاك، صحابك، شعبك، بحرو، خيراتو، سماه، أرضو، أو نتـا مالك خاسر شي حاجة؟ ياك العسكر، البوليس بين يـدّيك أو الغول الميركاني حاميك، مناش غادي تخاف؟ من الله؟ الله غير ديال الضعفاء، الطيبين أو المغلوبين على أمرهم، أمــّـا القوي ما كايـآمن غير بالطـّـنـك، القرطاس أو الـبـاروض، سلاح ميركان.
مغاربي
دارجة الزنقة
ياله من اسلوب، اتخيل سيبويه يصيح ملء الارض في قبره