مراد علمي
تعاويد باللغة المغربية كاتعـني حــكي ولا ّ عاود لـيــيــا لــَـحديث من جديد، باللغة العربية: "دردشة"، غادي يسمح ليــيـّـا الأديب، الشاعر، الروائي أو المبدع دريس أمغار المسناوي إيلا ستعرت كلمة "تعاويد" اللي وردات فى وحدة من رواياتو الشيقة اللي كولها حب، حنان، فرحة، تهنئة الوجدان، نشوة الحياة، عفة اللسان، رحمة، كولــّـها عسل سوسان، رتباط بالأرض، بالثقافة الحقيقية، أكيد أن أوزير الثقافة والإتصال ما عمـّـرو ما سمع بهاد السميـية ولا ّ عندو ولا كتاب ديال هاد المبدع صاحب الموهبة الروائية أو الشعرية الفياضة اللي ما عمـّـرو بخل علينا بإنتاجاتو الغزيرة، أو من جيبو الخاص، أكيد أن هاد أوزير الثقافة اللي هبط علينا من السما بحال "المهدي المنتظر" ما عندو حتى رتباط بالثقافة، واش الطبيب غادي يعرف يبني قنطرة، المهنديز يضرب حتى الشـّوكة؟ واش الميكانيسيان غادي يعرف خدمة الـكـبـّـاص، الكـبــّـاص للطـّـوموبيلات؟ ما عادا إيلا بغاوْا هادو يتـعـلــّـموا في شي حـدّ الصنعة حتى إرجعوا كايطيروا فيها من بعد 20 سنين.
واش اللي طيـيــّـحوا سنانهم فى ميدان الثقافة بحال اللي مـطــّـفل عليها؟ أكيد أن هاد لوزير الجديد ما عمـّـرو سمع شي سميية ولا ّ قرى حتى شي مؤلف ألــْـهاد الكتاب المغاربة، غادي إعذروني بعض الإخوة، الأخوات إيلا نسيت شي واحد ولا ّ وحدة منهم: محمد برادة، ياسين عـدنان، أحمد بوزفور، ماحي بينبين، حسن بورقية، محمد شكري، دريس شرايبي، زاكية داوود، يوسف أمين علمي، قدور علمي، إيدمون عمران المالح، علال الفاسي، عبد الكريم غلاب، سليم جاي، عبد الرفيع الجواهري، محمد خير الدين، دريس الخوري، أحمد المسيح، عبدالكبير الخطيبي، عبدالكريم الجويطي، طاهر بن جلون، عبداللطيف اللعبي، محمد عزيز الحبابي، فؤاد العروي، أحمد الصفريوي، محمد السرغني، عبدالحق
سرحان، ليلى السليماني، موحى السواك، عبدالله الطيع، بثينة الطويل، محمد زفزاف، عبدالله زريقة، محمد زنيبر ألخ، بعض المصريين: توفيق الحكيم، سلامة صلاح، طه حسين، عباس محمود العقاد، سلامة موسى، مصطفى لطفي المنفلوطي، نوال سعداوي، نجيب محفوظ، نبيل فاروق إلخ، بلا ما نذكروا الدول لوخرة من قبيل الجزائر، تونس، السودان، العراق، سوريا، لبنان، دول الخليج اللي كاتوفــّـر حتى هي على كم كبير من الكتاب، المفكرين، الفنانين إلخ، ما حساك عاد كتاب العالم المرموقين اللي الكثير منهم نال جائزة نوبل بحال: سالي برودوم، تيودور مومزن، داريو فو، هانريس بول، كونتار كراس، كاوو سنيندجيان، ألفريدا يليناك، أورحان باموك، دوريس ليسينج، هيرطا مولير، ماريو فاركاس ليوسا، مو يان، عدد لا يحصى من الكتاب، الفنانين، الرسامين إلخ من السمييات اللي ما يمكنش ليـيــّـا نذكرهم حتى هوما فى هاد الإطار، كايـتــّـحاصوْا بالمياوات، الألوفات.
الثقافة مهنة ديال أمــّـاليها، ماشي ديال صحاب الهموز، الـصـّـنطيحة أو الهضرة الخاوية بلا حتى شي كتاب، ولا مقال واحد خاص بهاد القطاع، ما عجبني غير داك الديكور السـّـوريالي بعد أمــّـا كتاشفوا بعض علماء الآثار المغاربة بمعية إخصائيين ألمان فـك، جمجمة ديال الإنسان العاقل اللي عندو 315 ألف عام ولو كانعرفوا لحد الآن أن الرقم الوارد يـلا ّه 200 ألف عام، لوزير ديال الثقافة ما عارفش قيمة هاد الإكتشاف الفريد من نوعو على الصعيد الدولي، كاعـد بحال شي مشموم ديال الورد، أو شنو هو ذنبو إيلا ماشي ذنب اللي دافعو؟ أكــيـد أنه سمع لأول مرة بالإنسان العاقل، أمــّـا فى المغرب ما عندنا غير اللي ما عندو عـقـل، ما كاين غير كـوّر أو عطي ألــّـعور.
أمــّـا فى ما يخص رفع دعوة باش تجني 100 مليون سانتيم اللي كان خاص ّ جوج ديال الصحافيين إدفعوها كغرامة مالية إيلا زكـّـات المحكمة دفوعات المدعي، من المحتمل أن هاد الراجل يربح القضية فى المحكمة، لأنه كانعرفوا كيفاش داير القضاء ديالنا، بلا ما ندخول فى التفاصيل، كاينين إخوان من ترانسبارانسي عندهم ملفات ديال الفساد أو ما كاين حتى
شي واحد بغى يقبطهم من عندهم، اللي فيه الفز كايقفز، هادوا هوما الوطنين اللي كايبغيوْا الخير لـجـميع المغاربة، المغربيات.
100 مليون سانتيم ما كايطلبهاش راجل سياسي متعقل، حكيم، لا! لأن مصداقيتو غادي أتــّـعـفــّـن، أو هادا خطء سياسي قاتل، لأن الناس غادي تقول مع راسها هادا ما كايخـمــّـم غير فى الفلوس اللي بغى يربحهم على ظهر ناس بسطاء، أصلا ما عندهمش، بحال إيلا هاد الراجل مخصوص، خـصــّـو غير إخـمّـم شي شوية أو إقول مع راسو: "واش كرامتي كاتسوى هاد الثمن؟لا! ما عندها ثمن أو ماشي ألــّـبيع ولا ّ ألــّـمساومة،" فى الدول المتقدمة الثريين كايتبرّعوا على الجمعيات الصادقة، يبنيوْا جامعات، حتى باسميتهم، كايعطيوْا هبات ألــّـمدون، ألــّـخيريات، كايوقفوا برجليهم أو إسربيوْاعلى الضعفاء أو المتشردين، ماشي كايبغيوْا إشـّـردوا صحافيين اللي الأصل الوحيد اللي عندهم هي مصداقيتهم أو نظافة ريشتهم أو ما مســّـخرينها لا لهادا ولا ّ ألا ّخور، إيــيــّـه بغينا، "أغــراس، أغــراس"، ولاكن ماشي نغـرسوا فى الناس شـوكة الفساد، الإنحراف أو السوء.
هادا اللي باغي 100 مليون سانتيم بلا ما يتعب راسو، علاش ألا ّ؟ إيلا شفنا آخـيـرا البرلمان خاوي ما بغى حـدّ إطل ّ على أوجه العثماني أو رباعـتو، بتعـبـير لطيف، حتى هادوا ناعسين فى ديورهم، ما باغيين خدمة، غير الفلوس، كلمة البرلماني كـافية، خـدّامة عليهم بالوكالة.
والله العظيم أو هاد الشهر المبارك إيلا هادي مهزلة، على من كايضحكوا هاد البرلمانيين المعكازين، باستثناء الشرفاء منهم؟ عـفــّـنوا الصورة ديال السياسة حتى مل ّ الشعب من سيفتهم أو من هضرتهم، قولتها المرة اللي دازت أو غادي نعاودها، الأحزاب السياسية فى الديمقراطيات العريقة طرف من المجتمع المدني لأنه عندهم متداد جماهري، الأغلبية الساحقة كانشوفهم غير كاتكون الكاميلة كاتـحـمـّـر، ديك الساعة عاد كايضوروا على الديور، بغينا باش أنـدوّزوا، صوتكم.
أمــّـا أسطورة أن المغرب دولة فقيرة هادي غير خرايف راشية، اللي كايقول بأن المغرب فقير باغي غير إبرّر فقر المغاربة باش يبقاوْا ساكتين أو إقولوا هاد الشي اللي طـلـــّـع المغرف، بحال إيلا هاد الشي قدر منزل، لا المغرب عندو خيرات لا تحصى، لا من ثروات طبيعية ولا ّ معدنية، شوفوا غير الفيلات، القصورى، الموبلات اللي مبنيين فى جميع ربوع المملكة، غادي تكتاشفوا بأن المياوات ديال الملاير ديال الدرهم تردمات فى الحجر أو السيما، غير فى كاليفورنيا، عين الدياب كاينين فيلات ما كاينينش حتى فى دول أوربية متقدمة، الأغلبية الساحقة ربحات فلوسها حلال، ولاكن كاينة واحد الفئة كبيرة من المفسدين اللي شراوها غير بالرشوة أو نهب المال العام، أو موشكل المغرب اليوما: الفساد أو التعليم الفاشل.
كانموذج للتعليم الناجح الدانمارك، فينلاندا، السويد، كولهم ما عندهم حتى شي ثروة طبيعية ولا ّ معدنية، عندهم العقولة أو كايـتـعتابروا من أسعد الدول فى العالم، لأن بالتعليم الناجح كايكونوا عندك أطر، طاقات بشرية اللي كاتوفـّـر فرص الشغل ألجيوش من أولاد الشعب، لأنها كاتفتح شركات على الصعيد المحلي أو العالمي، كاتكوّن الأطبية، المهندسين، اليد العاملة المتخصصة، جميع الأطر، كاتبني دولة ديمقراطية، فاين كايـتعلموا الدراري من الصغور أن الثقة أو المصداقية هي كولشي، بحال فى الدانمارك، يعني ما تسرقنيش، ما تكذبش علييـّـا، بني ليـيــّـا سبيرطارات، مدارس كاتشرّف، مرافق عمومية، ملاعب، خاطبني، سمع ليـيـّـا، تحاور معايا بطريقة سلمية، لاهراوة، لا قمع، لا قنبولة مسيلة للدموع، لا تطلق عليــيــّـا العسكر اللي خصـّـوا إحارب العـدو أو يحمي الحدود ماشي إطيح فى أولاد الشعب بالقرطاس، هاد الشي كاتقوم بيه غير الدول المتخلفة.
فى الآونة الأخيرة سمعت، قريت بزاف على الإنفصال، بالأخص فى إطار حتجاجات الريف، ما عمـّـرني سمعت شي واحد من اللي كانوا كايقودوا هاد الإحتجاجات السلمية أنهم بغاوْا ينفاصلوا على المغرب، بالنسبة ليـيـــّـا أكبر نفصاليين، هوما اللي نـفــاصــلوا كــولـيــيــّـا على
هموم الشعب، مشاكلو، تطلعاتو أو ما مـدّيــيـنها غير فى راسهم، أمـّا المحتجين هادوا كايبغيوْا الخير، غايورين على جيهتهم، من حقهم، أو من حق ذويهم اللي فى المهجر إساندوهم ماديا أو معنويا، لأن الدولة أو السياسيين المغاربة قالوا ليهم عوموا بحركم، شنو كايقول السي العتيق، عتق آ السي العتيق، أوزير الهجرة، والو! ما دافع على الجالية، ما قال كلمة حق ولا ّ تكلم على تهدئة الأوضاع الإجتماعية اللي كاتقوم بيها على طريق الحوالات الضخمة اللي كاتجني بيها الدولة الملايير من العملة الصعبة بلا حتى شي مقابل ملموس يذكر، حتى اللي كاينوب عليها ماشي من أوسطها، غريب عليها أو على مشاكيلها، ما فاد حـدّ السي عتيق، يعني هاد المنصب صوري، هو أصلا ً ما عندو حتى شي علاقة بالهجرة، حيت ما عمـّـرو خرج من المغرب، عبث فى عبث، بغينا الملكية، نرمـّـموا بيتنا ولا نخـرّبوه كيف خربوه العرب فى الشرق الأوسط، ولاكن المزيد من المرونة أو الحكمة باش نزيدوا القـدّام، ولا نعملوا بحال إيلا كانـتحـركوا، ولاكن باقي ما عملانش حتى الخطوة اللولة، أو فى ما يخص الإعتقالات الأخيرة ضروري يدخــّـل الملك محمد السادس أو يصدر عـفوو على جميع سجناء الرأي، لأنه كانغيورا كولنا على هاد البلاد أو ما بغيناش صورتنا أتــلـطـّـخ ولا ّ أتــّـشـوّه، حنا كولــّـنا مسؤولين، لا شعب، لا ملك، لا مجتمع مدني، لا أحزاب سياسية، نقابات ولا ّ جمعيات.
